БНХАУ-Монголын хилийн хамгийн том хуурай замын боомт болох Эрээн хот – Замын Үүдийн боомтоор энэ онд 600,000 зорчигч нэвтэрсэн тухай Эрээн хотын гаалийн газраас мэдээлсэн байна.

Мөн энэ оны эхний 4 сарын байдлаар тус боомтоор 150 мянган тээврийн хэрэгсэл нэвтэрсэн гэж хилийн орц, гарцын шалган нэвтрүүлэх газраас мэдээллээ.

Энэ оны эхний хоёр сард Эрээн хот – Замын Үүдийн боомтоор 19 мянган тонн жимс, хүнсний ногоо импортлосон нь өнгөрсөн оны мөн үеийнхээс 23.1 хувиар нэмэгдсэн бөгөөд, нийт импортлосон бараа бүтээгдэхүүний нийт үнэ 5.1 сая ам. доллар хүрсэн нь өнгөрсөн оны мөн үеийнхээс 16.7 хувиар өссөн үзүүлэлт юм.

Өнгөрсөн жилүүдэд Хятад, Монгол хоёр улсын хооронд хийсэн хуурай замын тээврийн 70 гаруй хувь нь Эрээн хот – Замын Үүдийн боомтоор дамжиж байсан бөгөөд зөвхөн 2023 онд 1.46 сая гаруй зорчигч, 262,000 тээврийн хэрэгсэл орж, гарсан байна.

Дөрөвдүгээр сарын 1-ээс эхлэн тус боомт ачаа тээврийн гаалийн бүрдүүлэлтийн ажлыг 24 цагийн турш гүйцэтгэж байгаа бөгөөд энэ нь зургаан сар үргэлжлэх юм.

БНХАУ-ын Хунань мужийн нийслэл Чангша хот болон Монгол улсын нийслэл Улаанбаатарыг холбосон шууд нислэгтэй боллоо. Нислэгийг Монголын агаарын тээврийн Хүннү Эйр компанийн Е190 нисэх онгоцоор долоо хоногт нэг удаа үйлдэж байх юм.

Бямба гараг бүрийн 21:40 минутаас Улаанбаатар хотоос хөөрсөн онгоц 01:00 цагт Чангшад газардах бол, ням гарагийн 01:55 цагт Чангша хотоос Улаанбаатар хот руу чиглэж 05:30 минутад газардах юм.

Энэхүү шинэ шууд нислэгийн чиглэл нь Монгол улс Төв Хятадыг холбож байгаа түүхэн дэх анхны маршрут бөгөөд Хунань олон улсын нисэх онгоцны буудлын зүгээс энэхүү нислэгийг Нэг Бүс Нэг Зам хөтөлбөр хамтын ажиллагаанд оролцох шинэ боломж гэж харж байна.

2024 оны 04-р сарын 08-ны өдөр Хойд Америк даяар буюу Мексик, АНУ, Канадын нутаг дэвсгэрт нар бүтэн хиртэх үзэгдэл ажиглагдаж, энэхүү үйл явдлын гэрч болохоор олон арван сая хүмүүс нар хиртэлтийн бүс дагуу цуглажээ.

АНУ-ын аялал жуулчлалын албаны хүмүүсийн мэдэгдсэнээр нарны бүтэн хиртэлтийг харахаар дор хаяж 4-5 сая хүмүүс аялсан нь тус улсын түүхэн дэх хамгийн том аялал жуулчлалын өдөр болж эдийн засагт 1.5 тэрбум долларын ашиг авчирсан гэж тооцоолж байна.

АНУ-ын 15 мужийн нутаг дэвсгэрт нарны бүтэн хиртэлт үзэгдэл ажиглагдсан бөгөөд энэ үеэр нислэгийн тийз, зочид буудлын төдийгүй машины зогсоолын талбайн үнэ огцом нэмэгдэж анхны үнээсээ дор хаяж 3 дахин өсжээ. Орон сууцны түрээсийн үйлчилгээ Airbnb-ийн захиалга тухайн 15 муж дагуу 90%-д хүрсэн байна.

Дараачийн нарны бүтэн хиртэлт 2026 оны 8-р сарын 12-нд тохиох бөгөөд дэлхийн бөмбөрцөгийн хойд хэсэг Гринланд, Исланд, Испани, ОХУ болон Португаль, Их Британийн зарим хэсгүүдэд үзэгдэнэ.

Монголын ЕБС-иудын хаврын амралт  болон БНХАУ-ын Ханш нээх өдрийн баяр өнгөрөгч долоо хоногт давхцсан юм. Эдгээр өдрүүдэд уул усаар холбогдсон мөнхийн хөрш Монгол улсаас жуулчид хүүхдүүдээ дагуулан Өвөр Монголын Өөртөө Засах Орны Эрээн хотыг зорин ирж, Үлэг гүрвэлийн музейг ихээр үзжээ.

Ялангуяа 04-р сарын 04-ний өдөр Эрээн хотын Үлэг Гүрвэлийн музей тун ч завгүй байлаа. Энэ өдөр Монголын 300 гаруй жуулчид музейгээр зочилж үлэг гүрвэлийн үүсэл түүх, зуршил, зан чанар, нэрсийг судалж эртний аварга биетний түүхээр аялжээ.

Үлэг гүрвэлийн чулуужсан олдвор, арга яс, сэргээн засварласан бодит мэт загварууд болон палеонтлогийн үнэт олдворууд бүхий үзмэрүүд нь зочин бүрийг Цэрдийн галавын үед аваачсан мэт сэтгэгдэл төрүүлж байлаа.

Зочид музейтэй танилцсаны дараа үлэг гүрвэлээр сэдэвчилсэн соёлын болон бүтээлч үзэсгэлэнгийн талбайд саатаж “Үлэг гүрвэлийн найзууд” дэлгүүрээс бэлэг дурсгал болон амттан худалдан авчээ.

Эх сурвалж: http://www.northnews.cn/

2024 оны 02-р сард 28 орны 3,113 гадаадын иргэнд Монгол улсын виз олгосон тухай Гадаадын иргэн, харьяатын газар мэдээлсэн байна. Түүнчлэн мөн хугацаанд 612 гадны иргэн Монгол улсад оршин суух эрх авсан бөгөөд 1,309 гадны иргэдийн оршин суух эрхийг сунгажээ.

Өнгөрөгч 01-р сард 31 орны 2,699 гадаадын иргэдэд визний зөвшөөрөл олгож, 3,495 гадаадын иргэн и-виз авсан байна.

2023 онд Гадаадын иргэн, харьяатын газар нийт 44,831 ширхэг Монголын виз олгосноос 31,242 нь и-виз байжээ. Түүнчлэн нийт 23,555 гадаадын иргэнд Монгол улсад оршин суух зөвшөөрөл олгосон бөгөөд, 19,488 иргэний оршин суух зөвшөөрлийг сунгаж, 12,658 иргэний бүртгэлийг хассан байна. 2022 оны дүнтэй харьцуулахад энэ нь 2.5 дахин нэмэгдсэн үзүүлэлт юм.

Монголын аялал жуулчлалын холбоо, Завхан аймгийн Аялал жуулчлалын холбоотой хамтран аялал жуулчлалын салбарт гарааны бизнес эрхлэгчдийн өсөлтийг дэмжих зорилготой B2B арга хэмжээг зохион байгуулах гэж байна. "Аялал жуулчлал - шинэлэг, чанартай үйлчилгээ" сэдвийн дор төлөвлөгдсөн энэхүү өдөрлөг нь аялал жуулчлалын санал болгож буй стандартыг дээшлүүлэх, салбарын оролцогч талуудын хамтын ажиллагааг дэмжих зорилготой юм.

Шинээр гарч ирж буй аялал жуулчлалын үйлчилгээ үзүүлэгчдийн 100 гаруй төлөөлөл энэхүү арга хэмжээнд оролцох болно. Энэхүү B2B өдөрлөг нь  Аялал жуулчлалын салбар дундын хамтрагчдын хамтын ажиллагааны цар хүрээг тэлэх, харилцан мэдээлэл солилцох, түншлэлийн гэрээ хийхэд чиглэсэн бөгөөд үйлчилгээ шинээр эрхэлж буй байгууллагуудын үйл ажиллагааг дэмжих, сурталчлан таниулах ач холбогдолтой.

Оролцогчоор орох хувь хүмүүс, аж ахуй нэгж байгууллага дараах холбоосоор дарж бүртгүүлнэ үү:
https://forms.gle/yNcSThpJYDGUUGzE6
Зочноор оролцох бол https://forms.gle/DatjbXjrtWNaAq3c6

Хэзээ: 2024 оны 3-р сарын 29, 30-ны өдрүүдэд 10:00-17:00
Хаана: Улаанбаатар зочид буудлын Баянзүрх, Сонгинохайрхан танхимуудад зохион байгуулагдана
Холбогдох утас: 9910-9816, 8888-0636 

Одоогоос 10 гаруй жилийн өмнө Ал Мактум олон улсын нисэх онгоцны буудал анхны олон улсын нислэгээ хүлээн авч байлаа. 2013 оны 10 сард Будапештээс хөөрсөн Уизз Эйр А320 нислэг Дубай Дэлхийн Төв /ДДТ/-д газардаж байсан юм.

Дубай хотын төвөөс баруун өмнө зүгт 32 км-ийн зайд орших тус нисэх онгоцны буудал нь ойрын ирээдүйд дэлхийн хамгийн том, хамгийн ачаалалтай нисэх онгоцны буудал болох зорилготой байна. Энэхүү алсын хараа нь дэлхийн эдийн засгийн томоохон зангилаа болох АНЭУ-ын байр суурийг нөөцийн асуудалд оруулахгүй байхыг баталгаажуулсан футуристик мега төв байх болно. 

Дубай Олон улсын нисэх онгоцны буудлын захиргаа Ал Мактум олон улсын нисэх онгоцны буудал ашиглалтад орохоор мөн менежментийг нь хариуцан ажиллах бөгөөд жилдээ 160 сая гаруй зорчигч, 12 сая тонн ачаа тээвэрлэх боломжтой болно гэж амлаж байна. Одоогийн дэлхийн хамгийн ачаалалтай нисэх онгоцны буудал болох Хартсфилд-Жексон Атлантагаас 63 сая зорчигчоор илүү гарах үзүүлэлт юм.

ДДТ нь агаарын хөлгийн засвар үйлчилгээ буюу салбарын хэллэгээр MRO-ийн төв аль хэдийн болсон бөгөөд хэд хэдэн агаарын ачаа тээврийн компаниуд салбараа байгуулж, түүнчлэн хувийн тийрэлтэт онгоцны болон захиалгат нислэг үйлдэгддэг газар болсон юм. 

Харин төлөвлөгөөт нислэгийн үйлчилгээ нь ихэвчлэн Зүүн Европ, ОХУ, Төв Азийн орнуудад үйл ажиллагаа явуулдаг хямд өртөг бүхий агаарын тээврийн үйлчилгээгээр одоохондоо хязгаарлагдаж байна.

ИРЭЭДҮЙН НИСЭХ ОНГОЦНЫ БУУДАЛ

Саяхан Ал Актум нисэх онгоцны буудалд зохион байгуулагдсан Дубайн агаарын шоуны үеэр ДДТ-ийн урт хугацаанд хэрэгжүүлэх стратегийн талаар зарим ойлголтыг танилцуулсан юм. Нисэх онгоцны буудал нь өмнө зүгт орших 145 кмв талбай бүхий цоо шинэ Өмнөд Дубай хэмээн нэрлэгдэж буй төслийн гол нэгж хэсэг байх болно. Энэхүү шинэ хотын төслийн зарим бүрэлдэхүүн хэсгүүд нь аль хэдийн бүрэлдэж эхэлсэн бөгөөд 950 сая долларын өртөг бүхий Эмиратын инженерийн төв болон нисэх, сансрын үйлдвэрлэлийн экосистемийн гол цөм болох Агаарын сансрын төв нь энэхүү алсын хараанд маш чухал үүрэг гүйцэтгэх юм.

2014 онд ашиглалтад орсон ойролцоох Катарын Хамад олон улсын нисэх онгоцны буудал нь холын зайн холболтын зах зээлд Дубайн шууд өрсөлдөгч бөгөөд жилийн 60 сая гаруй зорчигч хүлээн авах хүчин чадлаа нэмэгдүүлэхээр ажиллаж байна.

Монгол Улсын Их Хурлын дарга Г.Занданшатар Бүгд Найрамдах Киргиз Улсын Парламентын дарга Н.Шакиевын урилгаар Бүгд Найрамдах Киргиз Улсад албан ёсны айлчлал хийлээ. Айлчлалын үеэр Киргиз-Монголын хоёр улсын эдийн засаг, уул уурхай, худалдаа, хөдөө аж ахуй, зам тээвэр, соёл хүмүүнлэг зэрэг салбарт эерэг өөрчлөлт гарч байгааг онцолсон бөгөөд Монгол Улсын Их Хурлын дарга Г.Занданшатар хоёр улсын соёлын үйл ажиллагааг өргөжүүлэх тухайд хамтран ажиллах сонирхолтой байгаагаа илэрхийлж хоёр улсын соёл, түүхийн нийтлэг шинж чанарыг онцлон Дэлхийн нүүдэлчдийн наадмын хүрээнд хамтран ажиллах боломжийн талаар ярилцсан байна.  

Түүнчлэн хоёр улс оюутан солилцоо, шинжлэх ухаан, боловсролын салбарт хамтран ажиллахаар тохиролцож Монгол оюутнуудыг Киргизийн их дээд сургуульд тэтгэлгээр сурах боломжийг бий болгожээ.

Энэхүү засгийн газар хоорондын хэлэлцээрийн гол зорилго бол Азийн авто замын сүлжээнд Киргизстан улс элсэх хэлэлцээрт Монгол улс дэмжлэг үзүүлэх, хөрш зэргэлдээ улс болон бүс нутгуудын хооронд олон улсын авто тээвэр, олон улсын худалдаа, аялал жуулчлалын салбарыг дэмжих, хөгжүүлэх НҮБ-ын Ази, Номхон далайн эдийн засаг, нийгмийн комиссын гишүүн орнуудын хоорондын харилцаа холбоог бэхжүүлэх явдал юм.