БНХАУ-ын Соёл, аялал жуулчлалын яамнаас гаргасан удирдамжийн дагуу Хятад улс онлайн аялал жуулчлалын зах зээлийг өндөр чанартай хөгжүүлэхийн тулд түүний менежментийг бэхжүүлнэ гэсэн байна.

Удирдамжийн дагуу жуулчдын хувийн нууц мэдээллийн хамгаалалтыг сайжруулах, их дата ашиглан өндөр үнэ санал болгох, худал сурталчилгаа явуулах зэрэг жуулчдын эрх ашигт халдсан үйлдлээс зайлсхийхэд анхаарч ажиллана.

Аялал жуулчлалын салбарт татвар, хураамжийг бууруулах бодлогыг бүрэн хэрэгжүүлэхийг уриалж, онлайн аялал жуулчлалын чиглэлээр үйл ажиллагаа явуулж буй аж ахуйн нэгжүүдэд зориулсан зээлийн үр ашигтай хангамжийг санхүүгийн байгууллагууд нэмэгдүүлэхийг уриалж байна.

Түүнчлэн Хятад улс онлайн аялал жуулчлалын зах зээлд тавих хяналт шалгалтаа чангатгана гэж тэмдэглэжээ.

Завхан аймгийн Алдархаан сумын нутаг Ямаан усны дурсгалт газрыг 2021 онд анх илрүүлэн шинжлэх ухааны эргэлтэнд оруулсан билээ. Ямаан усны дурсгалт газар нь Завхан аймгийн Улиастай хотоос 50 гаруй км, Алдархаан сумын төвөөс баруун тийш 32 км зайтай оршдог, нутгийн иргэдийн шүтээн газрын нэг, далайн түвшнээс дээш 1800 орчим м-т орших Хүннүгийн цогцолбор дурсгал юм. Дурсгалууд боржин чулуулгаас тогтсон эгц өндөр хадан уулсын хөндийд 0.9 х 0,4 орчим км талбайд, нийт 9 бүлэгт хуваагдан тархан байрлах 154 булш дурсгалаас бүрдэж байна.

Судалгааны багийнхан үзэсгэлэндээ Хүннүгийн язгууртны дурсгалтай холбогдох 99 эд өлгийн олдворыг анх удаа дэлгэн, олон нийтэд үзүүллээ. Олдворуудын хувьд сүйх тэрэгний болон адуу малын тоног хэрэгсэл, зүмбэрдэж хийсэн үүлэн хээтэй модон тэвш, алт шармал хүрэл морины дүрст чимэглэлүүд, хаш чулуун эдлэл, шилэн эдлэлийн хэсгүүд, авсны ялтсан чимэглэл зэрэг нь урд өмнө малтан судлагдсан Гол мод 1, Гол мод 2, Ноён уул, Дуурлиг нарс зэрэг Хүннүгийн язгууртны томоохон оршуулгын газруудаас илэрдэг эд зүйлс тул “Ямаан ус”-ны дурсгалт газрыг судалгааны өндөр ач холбогдолтой болохыг нотлож байна. Эдгээрээс гадна СУВАРГА МЭТ МОДОН ЭДЛЭЛ, ХҮРЭЛ УТЛАГЫН САВ нь Монгол нутгаас анх удаа олдож буйгаараа онцлогтой байна.

“Ямаан ус”-ны дурсгалууд нь Хүннүгийн язгууртны дурсгалын гол онцлог болох үүдэвч бүхий “Урвуу Пирамид” хэлбэртэй, тахилын чулуун зураа, дагуул булш гэсэн үндсэн зохион байгуулалттай байна. Хээрийн малтлага судалгааг “Огторгуйн цагаан гарьд сан”, Завхан аймгийн засаг даргын тамгын газраас санхүүжүүлэн ШУТИС, ШУА-ийн Түүх, Угсаатны зүйн хүрээлэн, ШУА-ийн Археологийн хүрээлэн, МУИС, Улаанбаатарын Их Сургууль, Монголын Үндэсний Музейн судлаач, эрдэмтэд оролцон хамтран ажилласан юм. Уг төсөл нь мөн “2022 оны Монголын Археологийн шилдэг судалгаа”-аар шалгарсан билээ.

НҮБ-ын харьяа Дэлхийн Аялал Жуулчлалын Байгууллага болон Саудын Арабын Хаант улс аялал жуулчлалын боловсрол, мэргэжлийн хөгжлийг дэмжих чиглэлээр хамтарч ажиллана. 

Боловсрол ба Сургалт: Аялал жуулчлалын тэргүүлэх чиглэл

UNWTO нь Нэгдсэн Үндэстний аялал жуулчлалын төрөлжсөн агентлаг бөгөөд тэд боловсролыг салбарынхаа тэргүүлэх чиглэлүүдийн нэгээр тодорхойлсон. Аялал жуулчлалын салбар ч өөрөө ажлын байр бий болгодогоороо аль хэдийн тэргүүлэгч бөгөөд ялангуяа залуучууд болон эмэгтэйчүүдэд хамгийн их боломжийг олгодог юм. Тийм ч учраас UNWTO нь боловсрол, сургалт, ажлын байрны хүртээмжийг өргөжүүлж, энэ салбарт ажиллаж байгаа хүмүүсийг мэргэжлийн түвшинд хөгжихөд дэмжлэг үзүүлэхээр ажиллаж байна.

UNWTO-ийн Ерөнхий нарийн бичгийн дарга Зураб Пололикашвили: “Бидний эрхэм зорилго бол аялал жуулчлалын салбарыг сонирхож буй хэн бүхэнд дэлхийн хаана ч байсан олон янзын боломжуудаар хангах явдал юм. Бид ажил, ур чадвар, сургалтын зөрүүтэй байдлыг арилгаж, аялал жуулчлалын асар их боломжуудыг ажил олгогчийн хувиар хүргэхээр ажиллаж байна”

Саудын Арабын Хаант Улсын Аялал Жуулчлалын Сайд Ахмед Ал Хатеб: “Хүний үнэт зүйлийн хөгжилд хөрөнгө оруулалт хийх нь бид бүгдийн ирээдүйдээ хийж буй хөрөнгө оруулалт юм. UNWTO-той хамтарч ажилласнаар бид хөгжлийн боломжуудыг дэлхий даяар хүртээмжтэй болгож, аялал жуулчлалын салбарын тогтвортой хөгжил, ирээдүйг дэмжихэд шаардлагатай ажиллах хүчийг бий болгож чадна”.

UNWTO БОЛОН САУДЫН АРАБЫН ХААНТ УЛСЫН ХАМТЫН АЖИЛЛАГААНЫ ГЭРЭЭ

ITB Berlin 2023 үзэсгэлэнгийн үеэр UNWTO болон Саудын Арабын Хаант Улсын Аялал жуулчлалын яам хамтын ажиллагааны гэрээ байгуулж, аялал жуулчлалын сургалт, чанарын гэрчилгээ олгох хөтөлбөрүүдийг зохион байгуулахад чиглэж байгаа бөгөөд дараах сэдвийн хүрээнд хамтран ажиллах юм.

Онлайн сургалтууд: Дэлхийн аялал жуулчлалын салбарын ажиллах хүч буюу 300 сая хүртэлх хүнд чиглэсэн томоохон онлайн нээлттэй сургалтуудыг бий болгох. Сургалтууд нь мэргэжлийн болон менежментийн байх ба Араб, Хятад, Англи, Франц, Испани хэл дээр явагдана. Бизнесийн үйл ажиллагаа, Инноваци, Арга хэмжээний менежмент, Аяллын менежмент, Тогтвортой байдал, Зочид буудал, зоогийн газрын үйл ажиллагаа зэрэг сэдвүүд багтана.

Дээрх асуудлаар МАЖХ-ноос албан ёсоор хандаж Монгол улсын аялал жуулчлалын салбарын хүний нөөцийг хэрхэн чадавхжуулах, сургалтад хамрагдах талаар мэдээлэл авч холбогдон ажиллаж байна. Удахгүй та бүхэнд мэдээллэх болно. 

Дэлхийн Аялал Жуулчлалын хамгийн том экспо болох “ITB Berlin 2023”-ийн үеэр аялал жуулчлалын мультимедиа салбарын шилдэгүүдийг тодруулдаг “The Golden City Gate 2023” ёслолын арга хэмжээ боллоо.

Нийт 18 төрөлд шилдгүүдийг тодруулдаг тус ёслолын арга хэмжээний үеэр “TV Travel Magazine International” төрөлд “Roads of Mongolia” бүтээлээрээ өрсөлдсөн “Цолмон Трэйвел” ХХК-ийн ерөнхий захирал М. Навчаа тэргүүн байр эзэлж цомын эзэн болжээ. 

Энэхүү уран бүтээл нь Монголын аялал жуулчлалын салбарыг олон улсад контент хэлбэрээр сурталчилж буй цоо шинэ ажил юм.

Дашрамд дуулгахад “The Golden City Gate 2019”-өөс “Цолмон Трэйвел” ХХК-ийн санаачлагаар бүтсэн “Welcome to Mongolia” бүтээл мөн тэргүүн байрыг эзэлж байсан юм.

Вьетнам улс хөрөнгө оруулалт, аялал жуулчлалыг нэмэгдүүлэхийн тулд визний бодлогоо өөрчилж, гадаадын жуулчдад виз олгох журмаа сулруулахаар болжээ.

Тус улсын Олон нийтийн аюулгүй байдлын яамнаас өргөн мэдүүлсэн шинэ хуулийн төслийн дагуу цахим визтэй хүмүүс Вьетнам улсад 90 хүртэлх хоног байх боломжтой болсон юм. Мөн визний шаардлагаас нэг талдаа чөлөөлөгдсөн улсын иргэдийн визгүй байх хугацааг 15 хоногоос 30 хоног болгон сунгаж байгаа гэнэ.

Вьетнам улс одоогийн байдлаар 25 орны жуулчдыг визний шаардлагаас аль хэдийн чөлөөлсөн бөгөөд 80 орны жуулчдад нэг сарын хугацаатай цахим виз олгодог юм.

Энэхүү бодлого нь цар тахлын дараачаар тус бүс нутгийн бусад улс орнуудын аялал жуулчлалын салбар дахь өрсөлдөөн нэмэгдэж байгаа энэ үед гадаадын жуулчдыг татах зорилготой юм. Бодлого боловсруулагчид мөн энэхүү шийдвэрийг зөвхөн аялал жуулчлал гэлтгүй гадаадын хөрөнгө оруулалтыг татах боломжийг эрэлхийлэхэд тус дөхөм болж, эдийн засгийн өсөлтийг дэмжих хөдөлгөгч хүчийг бий болгоно гэж үзэж байна.

Вьетнам улсад энэ он гарснаас хойш эхний хоёр сарын байдлаар 1.8 сая гаруй гадаадын жуулчид ирж 3.6 тэрбум ам.долларын орлого олжээ. Тус улс энэ жил аялал жуулчлалын салбараас 27.3 тэрбум ам.долларын орлого олох зорилт тавьсан нь цар тахлын өмнөх үеийнхээс 90.3 хувьтай тэнцэх үзүүлэлт юм.

Аялал жуулчлалын салбар нь 2019 онд тус улсын дотоодын нийт бүтээгдэхүүний 9.2 хувийг бүрдүүлж байсан бөгөөд 18 сая жуулчин ирж 30.2 тэрбум ам.долларын орлого олж байсан гэдгийг албан ёсны статистик мэдээллээс харж болно.

Монгол улс энэ он гарснаас хойш 76,068 гадаадын жуулчин хүлээн авсан бөгөөд ОХУ, БНХАУ, БНСУ-аас хамгийн их жуулчид хүрэлцэн ирсэн байна.

Монгол улсын засгийн газар цар тахалд хамгийн их нэрвэгдэж хохирсон аялал жуулчлалын салбарыг сэргээх арга хэмжээнүүдийг идэвхтэй авсаар байгаа юм. Тодруулбал, 2025 оныг дуустал 34 улсын иргэдийг 30 хүртэлх хоногийн хугацаатай виз авах шаардлагагүйгээр Монгол улсад нэвтрэх боломжийг олгосон.

Түүнчлэн Монгол улсын засгийн газраас 2023, 2024, 2025 оныг “Монголд зочлох жил” болгон зарласан бөгөөд энэ онд аялал жуулчлалын салбарыг хөгжүүлэх зорилгоор 90 гаруй арга хэмжээг зохион байгуулахаар төлөвлөжээ. Монгол улс ойрын жилүүдэд гадаадын нэг саяас доошгүй жуулчин хүлээн авч аялал жуулчлалаас нэг тэрбум ам.долларын орлого олох зорилт тавьсан. Өнгөрөгч 2022 онд Монгол улсад 290,400 жуулчин зочилсон бөгөөд 350 сая ам.долларын орлого олж байсан юм.

Визийн шаардлагаас түр чөлөөлсөн улсын жагсаалт:

1. Бүгд Найрамдах Австри Улс
2. Бельгийн Хаант Улс
3. Унгар Улс
4. Бүгд Найрамдах Грек Улс
5. Данийн Хаант Улс
6. Испанийн Хаант Улс
7. Бүгд Найрамдах Итали Улс
8. Бүгд Найрамдах Латви Улс
9. Бүгд Найрамдах Литва Улс
10. Лихтенштайны Хант Улс
11. Люксембургийн Их Гүнт Улс
12. Бүгд Найрамдах Мальт Улс
13. Нидерландын Хаант Улс
14. Бүгд Найрамдах Польш Улс
15. Бүгд Найрамдах Португал Улс
16. Бүгд Найрамдах Словак Улс
17. Бүгд Найрамдах Словени Улс
18. Бүгд Найрамдах Финланд Улс
19. Бүгд Найрамдах Франц Улс
20. Бүгд Найрамдах Хорват Улс
21. Бүгд Найрамдах Чех Улс
22. Шведийн Хаант Улс
23. Бүгд Найрамдах Эстони Улс
24. Норвегийн Хаант Улс
25. Бүгд Найрамдах Исланд Улс
26. Швейцарын Холбооны Улс
27. Бүгд Найрамдах Болгар Улс
28. Ирланд Улс
29. Бүгд Найрамдах Кипр Улс
30. Румын Улс
31. Монакогийн Хаант Улс
32. Их Британи, Умард Ирландын Нэгдсэн Хаант Улс
33. Австралийн Холбооны Улс
34. Шинэ Зеланд Улс

Руанда Улсын Хөгжлийн Зөвлөл Ахмадын Хөлбөмбөгийн Клубуудын ДАШТ-тэй хамтын ажиллагааны санамж бичиг, гэрээг байгуулсан байна.

“Руандад зочил” кампанит ажлын хүрээнд хийгдсэн тус гэрээний дагуу дараагийн гурван удаагийн Ахмадын хөлбөмбөгийн клубуудын ДАШТ-ийг тус улсад хийхээр болж байна.

2024 оны 9-р сард анхны тэмцээн нь Руанда улсын нийслэл Кигали хотын Амахоро цэнгэлдэх хүрээлэнд болох бөгөөд дэлхийн өнцөг булан бүрээс 150 гаруй хөлбөмбөгийн домог болсон ахмад тамирчид оролцох төлөвтэй байна.

Руандагийн Хөгжлийн Зөвлөлийн Гүйцэтгэх захирал Клэр Акаманзи: “Энэ арга хэмжээг Руандад зохион байгуулах нь дэлхийд хурдацтай өсөж буй спорт аялал жуулчлал сонирхогчдыг улсдаа татах сайхан боломж болж байна. Энэ тэмцээн нь зөвхөн хөлбөмбөгийн хорхойтнууд төдийгүй, спортоор дамжуулан нөлөө үзүүлэхийг хүсэж буй олон мянган компани, брэндүүд, түншүүдийг татах болно. Түүнчлэн энэхүү тэмцээнийг зохион байгуулах нь олон Руандачуудыг орлого, ажлын байртай болгож байгаад баяртай байна”

Руанда улс Африк тивийн томоохон тэмцээнүүдийг зохион байгуулах спортын төв болох эрмэлзэлтэй. Албан ёсны мэдээллээр тус улс 2021 онд Спорт Аялал Жуулчлалаар 6 сая орчим ам.долларын орлого олжээ.

Дэлхийн аялал жуулчлалын байгууллага болон Бүгд Найрамдах Хорват Улсын Засгийн Газар, Аялал Жуулчлал, Спортын яам хамтран 2023 оны 4-р сарын 26-27-нд Дэлхийн Спорт Аялал Жуулчлалын хоёр дахь удаагийн их хурлыг зохион байгуулах гэж байна. Энэхүү их хурал нь хурдацтай өсөн нэмэгдэж буй спорт аялал жуулчлалын салбарын мэргэжилтнүүдийн шинэ санаа, шилдэг туршлагыг хуваалцах онцгой боломжуудыг хангадгаараа онцлогтой.

Энэ удаагийн их хурал “Тогтвортой байдлын төлөө Аялал Жуулчлал ба Спортын нэгдэл” хэмээх сэдвийн дор зохион байгуулагдах бөгөөд Спортын аялал жуулчлалын судалгаа, шинжилгээг гүнзгийрүүлэх, хурдацтай өсөн өсөн дэвжиж буй тус салбарын нөөц бололцоог тодорхойлох түүнчлэн үүсэж болох ойлголтуудыг дүгнэх, шинэлэг санаануудыг чиглүүлэх зэрэг зорилготой.

Спорт аялал жуулчлалын эдийн засагт үзүүлэх нөлөө, байгаль орчин, нийгэм, эдийн засгийн үүднээс “Тогтвортой Хөгжлийн Зорилго”-т оруулах хувь нэмэр, Спортын арга хэмжээг зохион байгуулах, ивээн тэтгэлэг татах, сурталчилах зэрэг хэд хэдэн гол асуудлууд мөн хурлын үеэр яригдах юм.

Хурлын үеэр яригдах сэдвүүд:

• Эдийн Засгийн тогтвортой байдал: Спортын арга хэмжээнүүдийн нөлөөллийг хэмжих нь
• Спортын арга хэмжээ аяллын чиглэл, Маркетинг ба Сурталчилгаа
• Спортын ивээн тэтгэлэг ба арилжаа
• Спортын арга хэмжээнүүд дэх Чиглэлийн Менежментийн Байгууллагын сайн туршлага
• Нийгмийн тогтвортой байдал: Спорт аялал жуулчлалын хөгжлийн стратеги
• Хүрээлэн буй орчны тогтвортой байдал: Спорт аялал жуулчлал дахь саад бэрхшээлүүд
• Эрүүл мэнд, Спортын аялал жуулчлалын байгууллагуудын Инноваци ба Цахим шилжилт

Дэлхийн Спорт Аялал Жуулчлалын II Их Хурал Бүгд Найрамдах Хорват Улсын Задар хотод 2023 оны 4-р сарын 25-27-нд зохион байгуулагдана.