Хоёрдугаар сард Хойд Солонгосын нийслэл Пхеньян дахь орчин үеийн цанын баазад Оросын жуулчид 4 өдрийн аялал хийхээр болсон байна. 2020 оны 1-р сард ковид-19-ийн улмаас хилээ хааж байсан тус улс ийнхүү 4 жилийн дараа анх удаа гаднын жуулчид хүлээж авахаар болж байгаа юм.

Хойд Солонгосын хамгийн том дипломат холбоотон, эдийн засгийн түнш Хятад улсаас биш Оросоос жуулчин очихоор болсон нь гэнэтийн мэдээ байлаа.

Владивосток хотод төвтэй Восток Интур компанийн мэдэгдсэнээр 2-р сарын 9-нд эхлэх тус аялал нь нэг хүний 750 ам.доллар бөгөөд Алс Дорнодоос ирэх Оросын жуулчид Пхьенян-Умардын Масик чиглэлд 4 хоног аялах ажээ.

Приморийн мужийн захирагч Олег Кожемяко болон Хойд Солонгосын эрх баригчид тохиролцоонд хүрсний дагуу уг аялал зохион байгуулагдаж байгаа аж.

Хойд Солонгос Хятадаас урьтаж Оросын жуулчдыг хүлээн авч байгаа нь Ким Чен Ун ОХУ-тай түншлэлээ бэхжүүлэхэд анхаарч байгааг дахин нотолж байна гэж Сөүл дэх Кюннам их сургуулийн Алс Дорнод судлалын хүрээлэнгийн профессор Лим Юл Чун мэдэгдсэн байна. Цар тахлаас өмнө Хойд Солонгост ирсэн олон улсын жуулчдын 90-ээс дээш хувийг Хятад жуулчид эзэлж байсан тул Хятадаас ирэх аяллыг сэргээх нь Хойд Солонгост чухал хүчин зүйл хэвээр байх болно гэж тэрээр нэмж хэлжээ.

2019 онд Хойд Солонгост нийт 300,000 гаруй жуулчид ирж байсан бөгөөд ойролцоогоор 150 сая долларын орлого олж байсан байна.

НҮБ-ын харьяа Дэлхийн Аялал Жуулчлалын Байгууллага /UNWTO/-ийн нэрийг дурдах болон товчлоход төвөгтэй байгаа талаар хүн бүр ярьж байсан. Тэгвэл НҮБ, Дэлхийн Аялал Жуулчлалын Агентлагт рэбрэндинг хийж хялбар нэр оноож өгөхөөр болж байна.

Өнгөрөгч 10-р сард Самарканд хотод болсон НҮБ-ын Ерөнхий Ассамблейн үеэр  UNWTO буюу НҮБ-ын харьяа Дэлхийн Аялал Жуулчлалын Байгууллагын нэрийг сольж илүү хялбар “НҮБ Аялал Жуулчлал” хэмээх нэртэй болж байгаа талаар анх зарлаж байсан. WTO хэмээх товчлол нь үргэлж World Trade Organization-тэй андуурагддаг байсан бөгөөд шинэ нэр нь хүмүүст хайлт хийх болон нэрийг дуудахад илүү хялбар болж байна.

Мөн шинэ нэрний хамтаар шинэ уриа гарж ирсэн. Шинэ уриа нь “Дэлхийг ойртуулах” ажээ.

НҮБ Аялал Жуулчлалын шинэ брэнд ирэх хэдэн сарын хугацаанд олон нийтэд хүрэх бөгөөд вебсайт, сошиал медиа болон бусад мэдээллийн самбарууд мөн шинэчлэгдсэн байна.

Мадрид хотод төвтэй НҮБ Аялал Жуулчлал нь нийт 160 гишүүн орон, хэдэн зуун хувийн хэвшлийн салбар, олон бүс нутагт салбартай юм. Тэдний гол зорилго бол тогтвортой аялал жуулчлалыг дэмжих үүрэгтэй. Түүнчлэн дэлхийн аялал жуулчлалын гол дата, мэдээллийн эх сурвалж нь НҮБ Аялал Жуулчлал юм.

Соёлын сайд Ч.Номин 54 дэх удаагийн Дэлхийн Эдийн Засгийн чуулганы үеэр Trip.com группийн Гүйцэтгэх захирал Жейн Сантай уулзаж аялал жуулчлалын салбарт хамтран ажиллах боломжийн талаар санал солилцлоо.

Уулзалтаар Соёлын сайд Ч.Номин Монгол Улсын Засгийн газраас баримталж буй аялал жуулчлалын бодлого болоод соёлын аялал жуулчлалын бүтээгдэхүүн үйлчилгээг хөгжүүлэх бодлогоо танилцууллаа. Монгол Улсын Засгийн газраас 2023-2025 оныг Монголд зочлох жил болгон зарласантай холбогдуулан энэ жил “Go Mongolia” үндэсний брэндингийг албан ёсоор танилцуулсан. Үүнтэй холбогдуулан Trip.com платформын бизнес загвар болох контентоор дамжуулан аялал жуулчлалын бүтээгдэхүүн сурталчлан танилцуулах, борлуулах чиглэлд хамтран ажиллахаар санал солилцлоо.

Trip.com нь дэлхий даяар 200 гаруй улс орон, бүс нутагт 1.4 сая гаруй зочид буудал, 5000 гаруй хотыг холбосон 2 сая гаруй нислэгийн сүлжээ бүхий платформ юм.

НҮБ-ын Дэлхийн Аялал Жуулчлалын Байгууллага энэ оны анхны аялал жуулчлалын барометрийг гаргасан байна. 2023 онд олон улсын аялал жуулчлал идэвхтэй сэргэж цар тахлын өмнөх үеийн 88%-д хүрсэн бөгөөд барагцаагаар 1.3 тэрбум жуулчин дэлхийн хэмжээнд зорчсон гэж тэмдэглэжээ. Нислэгийн тоо нэмэгдэж, Ази тивийн зах зээл илүү эрчимтэй сэргэж байгаа нь 2024 оны эцэс гэхэд Олон улсын аялал жуулчлал бүрэн хэмжээний сэргэлтэд хүрэх боломжтойг харуулж байгаа гэнэ.  

2023 онд Ойрхи Дорнод, Европ болон Африк тив хамгийн өндөр үзүүлэлттэй гарсан юм.

Дэлхийн Аялал Жуулчлалын Байгууллагаас гаргасан Барометр тооцоолол нь 2023 оны салбарын үзүүлэлтийг бүс нутаг бүрээр иж бүрэн тоймлон харуулж байна. Үүнд:

• Ойрхи Дорнод нь 2019 оны үетэй харьцуулахад 22%-иар илүү жуулчин хүлээж авснаар бүс нутгийн сэргэлтээр тэргүүлсэн.
• Европ нь дэлхийн хамгийн олон хүн зорчсон бүс нутаг болсон бөгөөд 2019 оныхтой түвшингийн 94%-д хүрсэн бөгөөд бүс нутгийн дотоод эрэлт болон АНУ-ын жуулчдын эрэлт харьцангуй их байв.
• Африк цар тахлын өмнөх үетэй харьцуулахад 96%, Америк 90%-д хүрчээ.
• Ази болон Номхон Далайн бүс нутаг цар тахлын өмнө үеийн 65%-д хүрсэн сэргэлтийг үзүүлсэн байна.

Түүнчлэн Олон улсын аялал жуулчлал 2023 оны байдлаар 1.4 их наяд ам.долларыг эргэлдүүлжээ. Энэ нь дэлхийн нийт бүтээгдэхүүний 3%-ийг бүрдүүлсэн гэсэн үг. Салбарын түүхэнд 2019 онд хамгийн их буюу 1.7 их наяд ам.долларт хүрж байсан түүх бий.

2024 ОНЫ ТААМАГЛАЛ

Олон улсын аялал жуулчлал нь 2024 онд бүрэн хэмжээндээ хүртлээ сэргэж 2019 оны үзүүлэлтийг 2%-иар давуулах тооцоллыг Дэлхийн Аялал Жуулчлалын Байгууллагаас гаргасан байна. Үүнд Ази тив ялангуяа БНХАУ-ын гадаад болон дотоод аялал жуулчлалын эрчимжилтэд орж байна. БНХАУ-ын хувьд Франц, Герман, Итали, Нидерланд, Испани, Малайзийн иргэдийг 2024 оны 11-р сарын 30-ний өдрийг хүртэл визгүй зорчуулах хүсэлт гаргажээ. Мөн Ойрхи Дорнод, Африк, Персийн булангийн орнууд руу аяллын нэгдсэн нэг визээр зорчих боломжтой болж байгаа аж.

Европын тухайд 2024 онд тэргүүлэх байр сууриа хадгалах шинжтэй. Учир нь 3-р сараас эхлэн Румын, Болгар зэрэг орнууд Шенгений бүсд элсэж байгаа бол Парис хотод зуны олимпын наадам зохион байгуулагдах юм.

2024 онд дэлхийн Эдийн засаг болон Геополитикийн ороо бусгаа байдал олон улсын аялал жуулчлалд томоохон сорилт үүсгэсэн хэвээр байх болно.Нефтийн үнийн тогтворгүй байдал, Инфляцийн өсөлт, Өндөр хүү, Худалдааны тасалдал зэрэг нь олон улсын аялал жуулчлалын байр, тээврийн үнийн тогтвортой байдалд нөлөөлөх таамаглалтай байна. Түүнчлэн бизнес эрхлэгчдийн хувтд өндөр эрэлтийг даван туулахын тулд ажиллах хүчин, боловсон хүчний хомсдол хэвээр байх аж.

Өнгөрөгч бямба гарагт /2024.1.13/ Хонгконгийн аялал жуулчлалын зөвлөлөөс, өнгөрөгч 2024 онд 34 сая орчим жуулчинг хүлээн авсан тухай мэдэгдэл хийсэн байна. Зөвхөн 12-р сард л 4 сая жуулчин Хонгконгийг зорьжээ.

Хятадын эх газраас Хонгконг руу зорчигчид дээрх тооны ихэнх хувийг бүрдүүлсэн бөгөөд 5-р сарын амралт, зуны амралт болон 10-р сарын амралтын үеэр Хятад жуулчид хамгийн ихээр Хонгконгт зорчсон юм. Түүнчлэн 12-р сард Филиппин, Тайланд улсаас ирсэн жуулчдын тоо цар тахлын өмнөх үеийг давсан байна.

Жуулчдыг аяллын төрлөөр нь ангилахад хурал чуулган, үзэсгэлэнд оролцох зорилгоор ирэгсэд ихэнх хувийг эзэлсэн байна.  Мөн нэг жуулчин дунджаар 3.6 шөнийг Хонгконгт өнгөрүүлж байгаа бөгөөд Хонгконгийн аялал жуулчлалын зөвлөлийн хийсэн судалгаагаар жуулчдын сэтгэл ханамжийн үнэлгээ 10 онооноос 8.7 байгаа нь тахлын өмнөх үеийг давсан үзүүлэлт юм.

2024 оны 7-р сарын 26-аас 8-р сарын 11-ний өдрийн хооронд Франц улсын нийслэл Парис хотод зуны 33 дахь удаагийн олимпийн наадам зохион байгуулагдана. Энэ үеэр 11 сая гаруй жуулчид Парист зочлох урьдчилсан таамаглал гарсан бөгөөд татварыг 100% нэмэгдүүлэхээр болжээ. 2023 оны 12-р сарын 29-ний өдөр нийтлэгдсэн хуулийн шинэ заалтын /2024 оны Санхүүгийн хуулийн төслийн 140-р зүйл/ дагуу Парисын бүс нутгийн тээврийн үйлчилгээний татварт дээд тал нь 200% нэмэлт хураамж авахыг зөвшөөрсөн байна.

Парис хотын стандарт татвар taxe de séjour 2024 оны 1-р сарын 1-ний өдрөөс эхлэн жуулчны татварыг сүүлийн үеийн инфляцитай уялдуулан мөн 10% нэмсэн юм. Зочид буудлын үнэ олимпын наадмын үеэр хамгийн их нэмэгдэж байгаа бөгөөд өнгөрсөн зуныхтай харьцуулахад 300% нэмэгдэж байна.

Түүнчлэн Парис хотын метроны тасалбар олимпын наадмын үеэр хоёр дахин нэмэгдэх бөгөөд нэг талын тасалбарын үнэ 4 евро болж нэмэгдэх аж.

Францын засгийн газрын зүгээс жуулчдын татварын орлогыг олон нийтийн тээврийн хэрэгслийн урсгал шинэчлэлтэд зориулахаар төлөвлөж байгаа юм.

Хятад-Монголын хамгийн том боомт болох Эрээн – Замын-Үүдийн боомтоор энэ онд нэг сая гаруй хүн зорчсон бөгөөд нэг өдөрт хамгийн ихдээ 8,800 гаруй хүн зорчсон гэж мэдээлсэн байна.

Эрээн – Замын-Үүдийн боомт нь энэ оны 1-р сарын 8-нд дахин нээгдсэн бөгөөд 8-р сарын 30-аас зорчигч тээврийн галт тэрэг явж эхэлсэн юм.

Энэ жил ойролцоогоор 169,000 орчим тээврийн хэрэгсэл хилийн боомтын орц, гарцын шалган нэвтрүүлэхээр дайран өнгөрсөн байна.

Сүүлийн жилүүдэд Хятад-Монголын худалдааны цар хүрээ тогтмол нэмэгдэж байгаа бөгөөд 2022 оны байдлаар хоёр талын худалдааны хэмжээ 12.2 тэрбум ам.долларт хүрсэн нь өмнөх жилийнхээс 34%-иар өссөн үзүүлэлт бол энэ оны эхний 6 сарын байдлаар худалдааны өсөлт өмнөх оны мөн үеийнхээс 62.6%-иар өссөн дүнтэй гарчээ.

НҮБ-ын Дэлхийн Аялал Жуулчлалын байгууллагын сүүлийн судалгаагаар Олон улсын аялал жуулчлал нь 2023 оны 1-р сараас 7-р сарын хүртэлх датагаар цар тахлын өмнөх үеийнхээс 84%-д хүрсэн бөгөөд аялал жуулчлалын түүхэнд тохиолдсон хамгийн хүнд хямралаас хурдацтай сэргэж байна гэж мэдэгджээ. Ойрхи Дорнод, Европ, Африк зэрэг бүс нутгууд салбарын сэргэлтийг тэргүүлж байна.

Аялал жуулчлал бүрэн сэргэх голдиролдоо оров

Аялал жуулчлалын эрэлт нь эдийн засаг болон геополитикийн сорилттой тулгарч байгаа ч тогтвортой өсөлт, сэргэлтийг үзүүлсээр байна. НҮБ-ын Дэлхийн Аялал Жуулчлалын байгууллагын 2023 оны 7-р сарын сүүлээр гаргасан барометрийн шинэ дугаарт:

• 7-р сарын эцэс гэхэд олон улсын жуулчдын тоо цар тахлын өмнөх үеийнхээс 84%-д хүрэв.
• 2023 оны 1-7-р сарын хооронд 700 сая жуулчин олон улсад аялсан нь 2022 оны мөн үеийнхээс 43%-иар өссөн үзүүлэлт.
• 7-р сар хамгийн ачаалалтай үе байсан бөгөөд нийт 145 сая олон улсын аялагчид бүртгэгдсэн нь 1-7-р сар хүртэлх нийт бүртгэлийн 20%-ийг дангаар эзэлж байна.

Дэлхийн өнцөг булан бүрт аялал жуулчлал хэрхэн эрчимтэй сэргэж байгааг НҮБ-ын Дэлхийн Аялал Жуулчлалын Байгууллагын тоо баримт дахин харуулж байна. Гэхдээ аялал жуулчлалын салбар сэргэхэд дасан зохицолт хэрэгтэй.

НҮБ-ын Дэлхийн Аялал Жуулчлалын Байгууллагын Ерөнхий Нарийн Бичгийн Дарга Зураб Пололикашвили: “Бидний хийсэн судалгаагаар дэлхийн өнцөг булан бүрт аялал жуулчлалын сэргэлт хэрхэн идэвхтэй явж байгааг харуулж байна. Хэдийгээр сэргэлт хурдацтай байгаа ч бидэнд дасан зохицолт хэрэгтэй. Сүүлийн саруудад бид тэс өөр үзэгдлийг харлаа. Өсөн нэмэгдэж буй аялал жуулчлалын урсгалыг зохицуулах чухал сорилтууд нь илүү хүртээмжтэй, тогтвортой, тэсвэртэй салбарыг бий болгох шаардлага байгааг харуулж байна.”

Үр дүн /бүсчилснээр/

Дэлхийн бүх бүс нутгуудад 2023 оны эхний долоон сарын хугацаанд аялал жуулчлалын сэргэлт эрчимтэй байсан нь хэд хэдэн томоохон зах зээлийн олон улсын аялал жуулчлалын эрэлтээс шалтгаалж байна:

• Ойрхи Дорнод 2023 оны 1-7-р сард хамгийн сайн үр дүнг үзүүлснээ мэдээлсэн бөгөөд нийт аялагчдын тоо цар тахлын өмнөх үетэй харьцуулахад 20%-иар илүү байна. Тус бүс нутаг 2019 оны түвшинг давсан цорын ганц бүс хэвээр байна.

• Европ, дэлхийн хамгийн том зорин очих бүс болох Европ нь цар тахлын өмнөх үеийнхээс 91%-д хүрсэн бөгөөд энэ нь бүс нутгийн дотоодын аялал жуулчлал болон АНУ-ын аялагчдын эрэлтээс үүдэлтэй.
• Африк энэ 7 сарын байдлаар цар тахлын өмнөх үеийнхээс 92%, Америк 87%-д хүрсэн талаар судалгаа харуулж байна.
• Ази, Номхон далайн бүс энэ оны эхээр аялал жуулчлалыг дахин эхлүүлсэн бөгөөд мөн хугацаанд 61%-д хүрсэн сэргэлтийг үзүүлжээ.

Боломж

Дээрх тоон дүнгүүд нь энэхүү өсөлтөө хадгалснаар Дэлхийн аялал жуулчлалын салбар оны эцэс гэхэд цар тахлын өмнөх үетэй харьцуулахад 80%-95%-д хүрэх боломжтойг харуулж байна.

• Хятад болон бусад Азийн зах зээл аялал жуулчлалыг дахин сэргээж байгаа нь бүс нутаг болон дэлхийн бусад хэсэгт аялал жуулчлалын өсөлтийг нэмэгдүүлэх төлөвтэй байна.
• Олон улсын аялал жуулчлалын үр дүнтэй сэргэлтэд учирч буй сорилт болох Эдийн засгийн хүндрэлтэй орчин нь үргэлжлэх болно гэж НҮБ-ын Дэлхийн Аялал Жуулчлалын Байгууллагын шинжээчид зөвлөж байна.

Үргэлжилсэн инфляци, нефтийн үнийн өсөлт нь тээврийн болон байрны зардлыг өсгөсөн. Энэ нь жилийн үлдсэн хугацаанд зарцуулалтын хэв маягт сөргөөр нөлөөлж, жуулчид гэртэйгээ ойр болон богино хугацааны аялал хийх сонирхолыг нэмэгдүүлсээр байгаа юм.